ஜீவநாடி அற்புதங்கள்....

வைரக்கல் மோதிரத்தால் ஏற்பட்ட விபரீதம்...

"முன் ஜென்ம பாவம் என்று மட்டும் சொல்லி எங்களை பரிகாரம் செய்ய சொல்லாதீர்கள். அப்படி செய்து செய்து அலுத்து போய் விட்டோம். வேறு ஏதாவது சொல்லுங்கள். நாங்கள் செய்கிறோம். எப்படியாவது எங்கள் கஷ்டம் விடிந்தால் போதும்" என்று மிகுந்த வேதனையோடு சொல்லி என் முன்பு அமர்ந்தார் ஒரு நடுத்தர வர்கத்து பெண்!

'அப்படி என்ன கஷ்டம் உங்களுக்கு?'

"நல்ல உத்யோகத்தில் இருந்த என் கணவருக்கு திடீரென்று உத்யோகம் பறிபோயிற்று. இரண்டாவது நன்றாக படித்துக் கொண்டிருந்த என் பையன் ஏதோ பித்து பிடித்த மாதிரி வீட்டிலே உட்கார்ந்து எதையோ வெறித்து வெறித்து பார்த்து தனக்கு தானே சிரித்து கொண்டிருக்கிறான். காலேஜுக்கு போவதே இல்லை.

'அப்புறம் ?'

எனது ஒரே மகள் பவித்ரா, நன்றாக இருந்தாள். புத்திசாலி பெண், வீட்டில் இருந்து வேலைக்கு செல்லமாட்டேன் தனியாக ஹாஸ்டலில் இருந்து தான் வேலைக்கு செல்வேன் என்று சொல்லி வீட்டை விட்டு தனியாக சென்று விட்டாள். நான் பித்து பிடித்த மாதிரி இருக்கிறேன். எங்களுக்குண்டான சொத்து, தோட்டம், வீடு எல்லாம் திடீரென்று ஏற்பட்ட கடனுக்காக குறைந்த விலைக்கு விற்க வேண்டியதாயிற்று. அப்படியிருந்தும் இன்னும் கடன் அடையவில்லை என்று மூச்சு விடாமல் சொல்லி, கொதித்து கொதித்து அழுதாள்.

பார்க்க பரிதாபமாக இருந்தது, கேட்கவும் சங்கடமாக இருந்தது.

'என் வினை தீர இதுவரையிலும் கடன் வாங்கியே பல லட்சம் ஜோதிடத்திற்காக, பரிகாரத்திற்காகச் செலவழித்து விட்டேன். இனிமேல் என்னிடம் விற்பதற்கு ஒன்றுமே இல்லை' என்றாள்.

'கணவருக்கு எப்படி வேலை போயிற்று?'

'யாரோ செய்த தவறு இவர் மீது பழியாக விழுந்தது பணம் கையாடினார் என்று சொல்லி வேலையை விட்டு நீக்கி விட்டார்கள். இதுதான் எங்கள் குடும்பத்தில் விழுந்த முதல் அடி'.

'உங்கள் பையனுக்கு என்ன ஆயிற்று?'

'காலேஜுக்கு போயிட்டு வந்தான், அவ்வளவு தான் தெரியும், மறுநாள் முதல் அவன் காலேஜுக்கு போகவே இல்லை. பைத்தியம் போல் தனக்கு தானே பேசிக்கொண்டான். சாப்பிடுவதும் இல்லை, குளிக்கவும் மாட்டான், போட்ட துணியை மாற்றவும் இல்லை, எதை கேட்டாலும் பதில் சொல்ல மாட்டான். எவ்வளவோ வைத்தியம் பண்ணி பார்த்தேன். நாளையோடு எட்டு மாசம் ஆக போகிறது அவன் காலேஜூக்கு போய், அவனுக்கு என்ன வந்தது, ஏன் எங்களுக்கு இந்த கஷ்டம்? என்று மீண்டும் அழுதாள். சிறிது நேரம் பொறுமையாக இருந்தேன்.

'என் பொண்ணு கை நிறைய சம்பாதிக்கிறா, அவளை வச்சு தான் என் குடும்பம் ஓடிக்கொண்டு இருக்கிறது. கூட இருந்து குடும்ப பொறுப்பை ஏற்பாள் என்று எண்ணினேன். ஆனால் அவளோ, இந்த வீட்டில் இருந்தால் நிம்மதியே இல்லை என்று தனியாக போய் ஆறு மாதம் ஆகிறது. என் குடும்பத்திற்கு யாராவது ஏதாவது பில்லி சூனியம் வச்சிருக்காங்களா? என்றார் அந்த பெண்மணி.

இந்த அம்மாள் சொன்னதை வைத்து பார்க்கும் பொழுது இது மாந்திரீகம் என்று கூட எனக்கு தோன்றியது. பதினைந்து நிமிடம் அகத்தியரை நோக்கி பலமாக பிரார்த்தனை செய்தேன். பிறகு நாடியை புரட்டினேன்.

'சட்டென்று கிளம்பட்டும் இவள் தன் வீடு நோக்கி, இரு நாட்கள் கழித்து காலையில் அகத்தியரை வந்து பார்க்கட்டும்' என்று தான் மாறி மாறி வந்ததே தவிர வேறு புதிய செய்திகள் எதுவும் என் கண்ணில் தென்படவே இல்லை.

'அம்மா உங்களுக்கு இன்றைக்கு அகத்தியர் வாக்கு எதுவும் வரவில்லை. ஆனால் காலதாமதம் செய்யாமல் உடனே வீட்டுக்கு கிளம்ப சொல்கிறார். இரண்டு நாட்கள் கழித்து வாருங்கள் அகத்தியர் நிச்சயம் பதில் தருவார். என்று அவளை கிழப்ப முயன்றேன்.

ஆனால் அவளோ நகரவே மறுத்தாள். வீட்டிலே போய் நான் என்ன செய்ய போகிறேன். இங்கேயே எத்தனை நேரமானாலும் இருந்து'நாடி' பார்த்து விட்டு தான் செல்வேன் என்று அடம் பிடித்தாள்.

'அகத்தியர் சொன்னால் அதற்கு என்னவோ ஓர் காரணம் இருக்கும். தயவுசெய்து வீட்டுக்கு கிஹம்புங்கள், வேறு எங்கேயும் செல்லாமல் நேராக வீட்டிற்கே செல்லுங்கள்' என்று மிகவும் கட்டாயப்படுத்தினேன்.இது எனக்கே சங்கடமாக தான் இருந்தது.

'ஆனால் அந்த பெண்ணோ வாய்க்கு வந்தபடி பேசினார். எனக்கு என்ன செய்வதென்றே தெரியவில்லை.

அகத்தியர் மீது தான் எனக்கு கோபம் வந்தது. எனக்கெதற்கு இந்த வீண் பழி. எதற்காக இந்த கேவலமான பேச்சு என்று மனம் நொந்து போனேன்.

அந்த பெண்மணி மிகுந்த வருத்தத்தோடும் கோபத்தோடும் போனது மட்டும் எல்லோரும் பார்த்த உண்மை. இதற்கு பிறகு என்னை பார்க்க வந்திருந்த மற்றவர்களுக்கு நாடி படிக்க மனதே இல்லை.

நன்கு மணி நேரம் கழிந்தது.

அந்த பெண்மணியிடம் இருந்து எனக்கு டெலிபோன் வந்தது! நேரில் திட்டியது இல்லாமல் டெலிபோனில் வேறு திட்டப் போகிறாள் போலும் என எண்ணிக் கொண்டே டெலிபோனை கையில் எடுத்தேன்.

ஐயா, என்னை மன்னிச்சிடுங்க தெரியாதனமா உங்களையும் திட்டினேன், அகத்தியரையும் திட்டினேன். நல்ல வேளை நான் உடனே வீட்டுக்கு போகவில்லை என்றால், தூக்க மாத்திரை சாப்பிட்டு உயிருக்கு போராடிக் கொண்டிருந்த என் மகனை காப்பாற்ற முடியாமல் போயிருக்கும். இதற்கு நான் அகத்தியருக்கு நன்றி சொல்ல வேண்டும் என்றாள்.

அவளது பேச்சிலிருந்து அவள் மிகப்பெரிய அதிர்சியிலிருந்து தப்பிய சந்தோஷம் இருப்பதை அறிந்து கொண்டேன்.

'பையன் ஏதோ விரக்தியில் தற்கொலை செய்து கொள்ளும் எண்ணத்தோடு தூக்க மாத்திரையை அளவுக்கு அதிகமாக சாப்பிட்டு மயங்கி கிடப்பதை அகத்தியர் அறிந்து, அவனது உயிரை காப்பாற்ற அவனது தாயை உடனடியாக அனுப்பி இருக்கிறார், இருந்தாலும் அவன் நல்லபடியாக குணமாக டாக்டர்கள் 48 மணிநேரம் ஆகும் என்றதால், இரண்டு நாட்கள் கழித்து பையனை அழைத்து கொண்டு வருவதாக அந்த அம்மணி சொல்ல நான் அறிந்து கொண்டேன்.

அகத்தியருக்கு நானும் தனிப்பட்ட முறையில் நன்றியை சொல்லி கொண்டேன். மூன்று நாள் கழிந்தது.

அந்த பெண்மணி தன் பையனோடு மறுபடியும் என்னை பார்க்க வந்தாள். காலில் விழுந்து அவளது மகன் ஆசீர்வாதம் பெற்றான்.எதற்காக இந்த கஷ்ட காலம் அது எப்போது நிவர்த்தியாகும் என்பதை மட்டும் அகத்தியர் சொன்னால் போதும் அதற்காக என்ன பிரார்த்தனை வேண்டுமானாலும் செய்ய தயார் என்றாள் அந்த பெண். அகத்தியர் இடம் அனுமதி கேட்டு படிக்க ஆரம்பித்தேன்.

'அவளது கணவர் லஞ்சம் வாங்கியே பழக்கப்பட்டு போனவர். அவருக்கு ஒரு நாளாவது ஒரு ரூபாயாவது லஞ்சம் வாங்கவில்லை என்றால் வீட்டுக்கு திரும்ப மனமே வராது. இவ்வளவுக்கும் மிகப்பெரிய கம்பெனியில் அன்றைக்கு எந்த லஞ்சமும் கிடைக்கவில்லை என்றால் அலுவலகத்தில் உள்ள எதையாவது ஒரு பொருளை, குறைந்த பட்சம் குண்டூசி பேக்கெட்டையாவது எடுத்து சட்டை பைக்குள் போட்டுக் கொள்வார். அப்படிப்பட்ட மனிதருக்கு ஒரு முக்கியமான நபர் முக்கியமான காரியத்தை முடித்து கொடுக்க விலை உயர்ந்த 'நீல கல்லை' வைரம் பதித்த ஒரு மோதிரத்தை அன்பளிப்பாக கொடுத்தார்.

சாதாரண குண்டூசியையே விடாமல் கொண்டு வரும் அந்த மனிதனுக்கு 'புளூ ஜாகர்' வைர மோதிரம் கிடைத்தால் விட்டு விடுவாரா? சந்தோஷத்துடன் வாங்கி தன் கால் சட்டைக்குள் மறைத்துக் கொண்டார். அந்த 'புளூ ஜாகர் வைரம்' எவ்வளவு கொடுமையான பலன் தரும் என்பதை அவர் அறியவில்லை, அறிந்திருந்தால் அதனை கொடுத்தவர் இடமே திருப்பி கொடுத்திருப்பார். அல்லது தூர எறிந்திருப்பார். அந்த வைர மோதிரத்தை எப்போது கையை நீட்டி வாங்கினாரோ, அந்த நிமிடத்திலிருந்து அவருக்கு கெட்ட காலம் ஆரம்பித்து விட்டது.

அஅந்த வைர மோதிரம் கொடுத்த நபருக்காக தவறான முயற்சியில் இறங்கி மாட்டிக் கொண்டார். பதவி பறிபோயிற்று. அப்பொழுதாவது அவர் யோசித்திருக்க வேண்டும். எதற்காக இந்த பதவி போயிற்று என்று. யோசிக்கவில்லை, விதியும் அவரை யோசிக்க விடவில்லை.

வீட்டில் வைத்திருந்த அந்த புளூ ஜாகர் மோதிரத்தை அவரது மகன் ஒரு நாள் அணிந்து கொண்டான். அன்று முதல் அவனுக்கு சட்டென்று புத்தி பேதலித்து விட்டது. பைத்தியம் போல் ஆனான், அதன் உச்ச கட்டம் தான் அவனை தற்கொலைக்கு தூண்டியது.

நன்றாக வசதியாக வாழ்ந்து கொண்டிருந்த இந்த பெண்மணிக்குறிய சொத்து, வீடு, மனை, வாகனம் அத்தனையும் அந்த வைர மோதிரத்தால் பறி போயிற்று. இப்பொழுது அவளது மகளையும் வீட்டில் இருக்க விடாமல் குடும்பத்தை விட்டே வெளியே துரத்தி இருக்கிறது என்று சொன்னார் அகத்தியர், அந்த புளூ ஜாகர் வைர மோதிரத்தை தலையை சுற்றி தூக்கி எறி வாழ்க்கை மீண்டும் வசந்தமாகும் என்றார், இது முன் ஜென்ம கர்மாவா இல்லை இந்த ஜென்மத்தில் செய்த தவறா? என்பதை இந்த பெண்ணே முடிவு செய்து கொள்ளட்டும்.

அகத்தியர் சொன்னது அத்தனையும் உண்மை என்று பின்னர் என்னிடம் வந்த அந்த பெண்மணியும் அவளது கணவனும் ஒப்புக்கொண்டார்கள். பீரோவில் வைக்கப்பட்ட அந்த வைர மோதிரத்தின் விலை 'நான்கு லட்சம்' என்றாலும் அது நாற்பது லட்ச ரூபாய் குடும்ப சொத்தை பாழடித்து விட்டது இப்போது அது எங்கேயோ ஒரு குப்பை மேட்டில் கிடக்கிறது.

ஆ, அந்த மோதிரத்தை தூக்கி எறிந்த பின்னர் வீழ்ந்த அந்த குடும்பம் இன்றைக்கு மீண்டும் சந்தோஷத்தில் மிதந்து கொண்டிருக்கிறது என்பது மட்டும் உண்மை.

நன்றி!

அகத்தியர் மைந்தன் - ஹனுமன்தாசன் ஐயா

குறிப்பு : ஐந்து வருடங்களுக்கு பிறகு மீண்டும் அகத்தியரின் அருளாசியல் மாசி மகம் (12.03.2025) முதல் ஜீவநாடி படிக்க துவங்கியுள்ளோம். முகவரி : ''பண்டிட்" லக்ஷ்மி தாச சுவாமிகள், 26/6, ஸ்ரீ விருட்ச பீடம், கிச்சகதியூர், இலுப்பபாளையம் அஞ்சல், சிறுமுகை - 641302, மேட்டுப்பாளையம் வட்டம், கோயம்புத்தூர் மாவட்டம். செல் : 07397 290 727